अेक सोनल सांझ
मुलमुली बेकळू रेत में धंस्योड़ै
उरबांणै पगां रै परस
अेक निकेवळौ, लूंठौ अर
बिलालौ अहसास
समै री टूंक सूं उतरतां
विलूंब्यौ हौ म्हैं
लो, सूंपूं हूं थांनै
म्हारी इंदरधनखी
अनुभूतियां री नमी
सेवण ज्यूं घूंटीजी ही
अेक कविता
धोरां री टूंक चढतां-चढतां
जबरी पांगरी है वा मरुगंधा
धोरै-धोरै पड़ैलां जा पसरी है।
उणरी घमरोळा
उणरी टूंक फूल्यौ है
अेक सतरंगी पुहुप
लो, सूंपूं हूं थांनै
कद सूं ई हेलौ पाड़ रैयी है
लारौ करतोड़ी
हिरणी री जात कुळाचां भरतोड़ी
धोरां री ढाळ उतरती
चटक ई आ पूगी है
म्हारै ठेठ नेड़ै
आपरै ई दमखम विळसी है
पाछौ वळनै लेय आयौ हूं
उणरी आंगळी अपड़ियां
उणरी मरुगंधा री कळियां
चटक रैयौ है अणहद नाद
लो, सूंपूं हूं थांनै।
