लेनिन री बखत दीपै जियां धजावां चिलकणी
दीपंती जाणै गदर री अमरज्योत हुवै
जाम अर सिखर उठै उण रै मान खातर
गीतड़ा रचीजै जिका बींरै जसां घुरै।
लेनिन रा बोल, सबळा अर जोरावर
देस रै माथे लैरावै ज्यूं मुगती रा हेला,
मैनत रा बंदां रै मनां रा मेळा कर,
आस रो सनेसो देवै, रीझै है सगळा।
आखै संसार रा मजूरां रो व्हालो है
बैर्यां री खातर भौ अर भार बण्यो,
हो म्हां मांयलो बो, जद अर नित-नित,
ओ मिनख सांच रो, खरी दीठां तणो।
थोड़ा री लूंट रा अंधारा चीरतो
रात री जुग जूनी छायां छितरावतो।
लेनिन री अक्कल भणाया जण-जण,
ग्यान सूं ई च्यानणो है, सगळां जतावतो।
लेनिन री साच दीनी सगती लड़ाकां,
पीढ्यां रै पार बा काटै है मारगिया:
जमीं मिली करसां, कारखाना कामगारां,
जुध मिल्या महलां, सांती झूंपड़ियां!’
बखत रो भार जिको कांधां भार्यां मारै,
पण, लेनिन री बखत सदा-सदा रैसी
बात जिकी म्हानैं सबळा जोरावर करै,
अूंचावती, जगमगावती यादगार कैसी।
खुसी किण बात सूं हुवै? सीर कर्यां
अूंचा विचारां, करमां नैं सिरजातां
सैणां री निसासां, बांरी मोज-मजां,
नुंवै खळां काढ़ी गुजी री गरमासां,
कईं बो है सरब हरख, चावै म्हे चावां,
म्हे टाबर एक गजब करती पीढी रा?
कईं आ नईं, दूजै सितारां री उडाणां
झूमतै राकेट री आखरी सीढी रा।
बिन खरच्यां, घण रूड़ी दिरस छटा उडीकै;
अणंत सूरज अूगै अर आपरी किरणां बरसावै,
बारणा सुरग री सभावां जा पूगै,
घण आघी अकास-गंगा रा मारगां ले जावै!
बखत रा बीत्योड़ा कायदां नैं छोड़ परा।
जिणां सूं नईं हरख रै रंग में भंग पड़ै,
मौत अर सुळण माथै नित-नित जीतता,
अमरपदो सौरमां म्हारी सांसां चढै।
अर दूजा नखतरां री जातरा सूं पाछा फिर,
धरती मा री आंसू भरी आंखड़ल्यां चूमां,
साथी गिगन पुरसां री खबरां सुणता
म्हारी धरा-गिगनां रै पार सूं संचर्या।
बै है हरख री बातां म्हे चावां—
अंतरिख जुपावतां माथै री सगत्यां,
दीसती जावै आ जीवती जोधज्वान,
डरपती सूनां नईं अंधारां रळत्यां।
