1
लाल लीक रै पार—पग-पग माथै
बैरी सूं भेंटो।
अर फाट्योड़ा कंठां सूं,
सोच भरी सुरसुराट, अेक निसांस, अेक बड़बड़ाट,
मोरचै सूं गुपत गुरां में तार आयां जावै।
केमलिन री खतरै री घड़ी—धंसती सी।
बिरखा री झड़ में,
खबरां अर विगतां रो घिरतो पूर,
झर्यां जावै—
अर लेनिन रै माथै मांय कर झर्यां जावै।
लेनिन आपरै दफ्तर में,
सांत मुद्रा में,
बांच्यां जावै।
आदेस दियां जावै
विचार आंटीला, गूंथ्योड़ा
मुक्कियां ज्यूं।
सध्योड़ी लागणनै।
बो बठै बैठ्यो है
लिखतो,
पाना जोड़तो, खणां नैं उथळ-पुथळ करतो,
भवां री मोटी कबाण
मेज रै दीवट री चमक सूं होड करै,
बा बळनिधान मेधा, फोलादी कबाणी ज्यूं तण्योड़ी।
हरेक बात रो उथळो सोधणो नैचै।
म्हे कियां सिरज सकां,
अेक सेना री सांतरी रचना करां
जिकी कदे हारण रो नांव नईं लेवै?
कियां, पण कियां—मुस्कलां रो इसो गोट,
कियां हाथां सूं निनाण अर खेतां री बाट रोकां,
खेतां री जोत अर जमीं कियां बधावां?
अखबार अर पोथ्यां कियां बधावां?
अखबार अर पोथ्यां कियां पुगावां?
कियां अग्यान मिटावां?
काल रा गुलामां री
ग्यान री भूख नैं तिरपत कर
बेगारां नैं गुरूपद दिरावां?
अर रसोइयां नैं—क्यूं रसोवड़ां में
बाध’र राखां?
बांनैं पण, मुलक रो राज करणो सीखणो चाइजै।
सवालां रो छेड़ो नईं।
छिण भर रो चैन नईं
जितै बींनैं खरो उथळो नईं मिलै।
पण हाल मोरचै सूं
गुपत गुरां में तार,
अम्बार लागै, रोसनी रोकता।
2
सोच विचार रा डूंगर ऊंचा बधै
लेनिन बांनै सल्टावै, आपरै मारग री सुरंग काढै,
पण बखत थळी री तपती लुवां ज्यूं बगै
अर बखत इसो खाथो है।
पण ओ कईं?
अेक ज़िंदाबाद,
कोई गूंज्यां जावै
बरामदै में...
इसा कईं लोग है, ठा करण!
आंख्यां हरख में दीपै
लेनिन उठै
अर आडै माथै जावै।
आगै झुकतो,
बो बीनैं चोपट करै,
हां, ओ अेक डोकरो है बठै,
आपरी बात कैवणनैं अुतारू
बो इत्तो अळघो आयो है
लेनिन सूं मिलण नैं, बो कैवै,
नैचै बै बींनैं कदे काढै नईं।
लेनिन ध्यान सूं सुणै।
अरे, ओ तो अेक करसो है?
अर ईं नैं कईं चाइजै?
अेक पगरखी रो जोड़ो।
बीं आपरै साथीड़ां सूं मांग करी।
बां बींनैं दियो—नकारो।
कुण ई परवा नईं करै,
बै नईं करै,
कोरा मोर थापै
अर बींनैं बिड़दावै,
इणसूं आवण री जची बींरै
खुद लेनिन कनैं।
कामदार सोच ईं नईं सकै
फेर कईं कैवै,
बींसूं कियां पिंड छुडावै।
बींनैं टरका ई सकै नईं,
बो तो जमग्यो—हेन तेन चालै नईं!
बींनैं मोड़ो देखावणो—
हीसत री दरकार पड़ै!
पण लेनिन नैं, इसो लागै, कोई अूतावळ नईं,
जे बखत हाल बीत्यां जावै
बींरी आंख में अेक मुळकण है,
दो सैंचन्नण चिलकणां।
चाणचक आडो चोपट खुलै
अर बो अेक डग भरतो आय पूगै।
कठै सूं आयो तूं?
साइबेरिया,
घणां दिन हुया बारै?
अबै च्यार मईनां जाणो।
बेटो लाल फोज में, आयोग्यो सागै ई।
थांरै कनैं जमीं पूरी सूरी हुसी?
हां, अबै तो म्हारै मोकळी है
जणै अठै कियां आयो?
गांव मनैं अठै भेज्यो
हळिया अर खुरपा कस्यां लेवण सारू—
मैं घणखरा अबार ताईं बै भेज दिया।
चोखो, अबै तन्नैं कईं चाइजै?
अबकै बा बात आई, अबकै बींरो ओसर आयो—
पगरखी!
अर लेनिन कानी— अेक बूझती निजर।
हां, ओ मिनख अेक करसो है,
अर करसै नैं पगरखी चाइजै।
बीं आपरै साथीड़ां नैं बूझ्यो हो।
बां दियो हो बींनैं—नकारो।
बांरी कईं परवा नईं
बै कईं नईं करै, कोरा मोर थापता
अर बीनैं बिड़दावता।
इण सूं बी नैचै करी जावण री
खुद लेनिन कनै।
लेनिन फाट-फाट’र हंस्यो, पूठां माथै हाथ दियां,
अर मचकावण लाग्यो करसैं नैं मोज में
दोनूं आंख्यां दया भरी अर बींरो मोल करती।
फेरूं, आपरी मेज माथै बैठ’र
कड़क रीत सूं,
बो मांडै
आ हुंडी सरोकार सेती,
कागद हाळै नैं दीज्यो
ऊंचा जूता, अेक जोड़ो।
ठीक है, आ ई ठावी बात।
आपरो टोप उठाय चाल्यो
अर दोनूं हाथां सूं
बीं बो पास माथै उठायो,
जियां बो जूता अूंचावसी
आखर जूता तो बींरा हुय ई गया।
लाल लकीर रै पार—पग-पग माथै
बैरी सूं भेंटो
अर फाट्योड़ा कठां सूं
सोचभरी सुरसुराट, अेक निसांस, अेक बड़बड़ाट,
मोरचै सूं गुपत गुरां में तार आयां जावै।
अबै फेरूं दिमागी झगड़ै कानी।
कारण बखत री उडाण घणी निरदई
अेक’र फेर बींरा संकळप
उठै, पवनबेग उडै
अर सौ कईं नकारीजै
बींरी सगत रै सामो।
अरै, मैनत रा जबरा मिनख,
तनैं तो पगरखी मिलणी ही, फेर नईं ईं में।
अर लेनिन नैं थारली सुणनी ही।
थारी दरकारां नैं बो भलां जाणतो,
जे कदास ओर ई घणो कमतर हो,
अर चावै बखत रच ई नईं हो।
