धोरां री ओट सूं
निकळै सूरज
बोलै बुड़िया अर
चिड़कलियां
खैजडां सूं ऊतर
चूंण री जुगाड़ में
निकळै है मोर।
खैड़े-खैड़े थपियौड़ा थान
अर
मिंदरौं में बाजै
टंकौरा
होवै शंखनाद।
तंबाड़ै गायां
रिड़कै भैंस्यां
बोबाड़ा करै बकरियां
झेरावै सांढणियां
खीजै जाकौड़ा।
दो जूण
रोटी रै जुगाड़ में
निकळै
मिनख
किणीं रै हाथ में
टीपण तो किणीं रै
खंवै कीनौड़ी
थैली
होरण बजावती
गांव री गळियां सूं
निकळै बस
कैई बस री छत माथै
तो कैई सीटां
माथै बैठ’र सफर
करै गांव रा मिनख।
