कुण सूरज री धूंणी तापै कुण तारां री चुनड़ी छापै
कुणरै खेतां मेढ उजड़गी कुण री पाखी सींवां नापै
कुण लकड़ी में आग लुकाई कुण पा'ह्ड़ां में बरफ जमाई
कुणरी खातर बैह र्या झरणा कुण खातर हरियाली छाई
कुण मकिये में घालै मोती ऊपर सूं पैरादै धोती
कुण काया रा टांका सी कर नेणां में भर देवै जोती
कुण केलै में घाल्यो सीरो कुण शरबत सूं भर्यो मतीरो
कुण कारीगर बैठ जमीं में छानै सी चमकादै हीरो
कुण समदर नै पाणी पावै कुण रोजीना मैह बरसावै
किण रै खातर फिरै बायरो कुण जीवां नै नाच नचावै
कुण ओ खारा मीठा चाखै कुण साँसाँ री गिणती राखै
कुण डोरी खींचै उपर सूं बिना बतायां आडा नाखै
कुण चानड़लो बैठ बणायो आभै में ऊंदो लटकायो
गाणी माणी फिरै घूमतो कुण ओ बेली खेल रचायो
