म्हैं भूल’र मारग
आयग्यो हूं पगडंडी माथै
पगडंडी फंटती जाय रैयी है
म्हारै च्यारूं मेर
म्हैं सोधतो रैयो हूं
म्हारो घर
म्हारो गांव
अर म्हारा बेली
पण इण बार
म्हैं भूल’र मारग
भटक रैयो हूं।
इण बार नीं दीख रैया है
रूंख, म्हारी मारग री ओळखाण करावता
रूंख, जका नै काट लिया
म्हारा बेली।
म्हारा बेली नीं मिलणो चावै म्हासूं
तदी तो बै काट नाख्या है
सारा सैनाण
पगडंडी माथै ऊग्योड़ा रूंखा रा।
म्है हांफ रैयो हूं
भटक-भटक’र
मारग माथै
पगडंडी माथै
हुय रैयो हूं निढाळ।
म्हैं जोय रैयो हूं
छीयां किणी रूंख री
जठै लेवणी चावूं
बिसाई।
म्हैं देख रैयो हूं
बिसूंजतै सूरज कानी
म्हनैं नीगै नी आवै
दूर तांई कोई रूंख
म्हनैं तो दीख रैयो है –
बिसूंजतो सूरज
अर
पसरतो अंधेरो।
