काळ-दुकाळ रै दोवणै
अर मेह रै रांडी-रोवणै में
कठैई—
भूखी-तिरसी नीं रैय जावै म्हारी कविता।
कैर-कंटाळा झाड़-बांठकां
अर खींप-सिणियां में अळूझ’र
कठैई—
लूखी-सूकीं नीं रैय जावै म्हारी कविता।
गांव री सूनी गिंगरथ-गोही
अर सरणाटै वाळी रिंधरोही में
कठैई—
आपरो मारग नीं भूल जावै म्हारी कविता।
मरुधर रा सोनलिया धोरां
अर उण सोनलिया धोरां
अर उण माथै मंडती कोरां हेठळ
कठैई—
जीवत-समाध नीं लेय लेवै म्हारी कविता।
