मिनख जमारै आई एक नार
मैणत मिणिया फिरावती
करम तणा कमठांण करती रैयी
आपरै आपै रै अपांण
तन ताकत सूं तगारी तोलती
पूगगी पांचवैं माळै
अडाण रै आसरै
भाटा ईंटां रा भारा ऊंचाया
रेती कांकरी अर गारौ
गरकायौ मंजिल दर मंजिल
तन तपायौ तळतळतै तावड़ै
ठारी ठोकीजती हाड कंपायौ
पण ओळभौ नीं ईसर नै
कड़कड़ावती कड़ियां रळकतै कंदोरै रै
काट नीं लागण दियौ इण कामेतण
लाली लगाई नीं गोरै गाल
भोडळ नीं भुरकायौ भाल
पोडर पंपाळ नीं पाळिया
मन फूटरापै मोदीजती रैयी मानेतण
करम रा फरज करण रा जतन में
कसमसीजती रैयी काया कामेतण री
गैणां गांठां रौ गायौ नीं गीत
आस करी नीं दिखणी चीर
केई मैल माळयिा चुणीजिया
इणरी अणथक मैणत रै पांण
पण कदैई सुपना नीं पाळयिा
माळयिां री माया माणण रा
आपरै टपकतै टापरै राली रै आसरै
केई रातां काढी कडूंबै रै साथ
इण में ई केई जापा जीमिया
जुग जामेतण जतन सूं
लीर लीर हुई लूगड़ी री ओट
गीगै नै हांचळ चूंघायौ
छाजै री छींया बैठ
उम्मीद नीं पाळी गीगै नै
पालणियै हींडावण री
रेत में रमता कद मोटा हुयग्या
खुद इणनै ई पतियारौ नीं रैयौ
विधना रै घड़ियोड़ी आ पूतळी
खरी मजूरी करती रैयी
कदैई ठेकेदार री ठगी निजरां चढी
कारीगर ई कुचमादी करी हुवैला
तौ मसकरियां मजूरां ई करी
आब नीं गमाई इण गजबण
इण कमठा सूं उण कमठा
रबकती रैयी आ रळयिावणी
पेट रा पंपाळ काया नै भाड़ौ भरण
आथड़ती रैयी अणथाग अबखायां सूं
उमर दर उमर पगोतियां चढती रैयी
जीवण रा जतनां में जुतियोड़ी
गरब नीं कियौ जोबन तणौ
करम करण जामी आ कामेतण
बट्टौ नीं लगायौ आबरू
नीं खबरां में खबरीजी कदैई
किणी अजाण साथै अलोप हुवण री।
