होळी रे नारेळ दाईं
होमावै है जिनगाणी
सूखो-कीच कमळ री दाईं
पोमावै है जिनगाणी!
देखो-देखो
इण री माया
देखो-देखो
इण री काया
देखो-देखो
इण री छाया
इण री करम-कहाणी..!
होळी रे नारेळ दाईं
भरमावै है जिनगाणी
सूखो-कीच कमळ री दाईं
करमावै है जिनगाणी!
ऊंधा इण रा
मै'ल-माळिया
ऊंधा इण रा गै'ला
ऊंधा इण रा आटा-पाटा
अर पाणी रा रेला...
ऊंधा इण रा
झगड़ा-टंटा
ऊंधा इण रा सट्टा
ऊंधा इण रा हेत-भरोसा
बैठ गया सब भट्टा
इण री सिकल पिछाणीं...
होळी रे नारेळ दाईं
सरमावै है जिनगाणी
अठी-वठीनै नजर फेरनै
टरकावै है जिनगाणी!
जिनगाणी रो
किस्सो देखो
जिनगाणी रो
हिस्सो देखो
जिनगाणी रो
हिस्सो देखो
जिनगाणी रो
घिस्सौ देखो
नीत रही अणजाणी-
इण नै किण री पतवाणी!
सूखो कीच कमळ दाईं
करमावै है जिनगाणी
आनो-आनो पाई-पाई
भरमावै है जिनगाणी...
गळी-गळी में
गांव-गांव में
फिरै सियाळी स्याणीं
कानां-देखो
सुणो आंख सूं
इण री बोली वाणी
होळी रै नारेळ री नाईं
सरमावै है जिनगाणी
अठी-वठीनै निजर फेरनै
टरकावै है जिनगाणी।
