समरथ व्है समझां तौ ऊमर ई ऊमर है
नाचां तौ जिनगांणी घूमर ई घूमर है
काटां तौ सस्तर है
सीं’ल्यां तौ अस्तर है
पी’ल्यां तौ समदर है
करल्यां तौ कमतर है
इणरा रूप अणूता है
अजहूं अणकूंता है
ओढ़ां तौ जिनगांणी चूनर ई चूनर है
आभै रौ पांणी है
धरती री धांणी है
किण री तौ जांणी है
किण री अणजांणी है
सुरतां सार अदीठी है
झळती झाळ अंगीठी है
थाकां तौ जिनगांणी डूंगर ई डूंगर है
जोबन रा झाला है
मद भरिया प्याला है
समझां तौ इमरत है
अणसमझ्यां हाला है
इण रा नैण नसीला है
इण रा बैण रसीला है
निरखां तौ जिनगांणी मूमल ई मूमल है
पायल झणकारां है
गीतां गणकारां है
काजळ री कोरां है
मैंदी रतनारां है
आ तौ कांण-कनोरा है
आ तौ बांन—बनोरा है
पै’रां तौ जिनगांणी झूमर ई झूमर है
नाचां तौ जिनगांणी घूमर ई घूमर है।
