काळी अंधारी रात मांय
कसमसाती इच्छावां री भांत
आपणों असर दिखावै
उजास रौ कुंपळ ज्यूं
सूरज री पैली किरण बण जावै।
जिंदगी
मोटी-मोटी चट्टानां री भांत
खुरदरी, चीकणी निजर आवै
जठै
पाणी कोनी टिक पावै
पग कोनी जम पावै
फेर भी
किणी तरेड़ री छेकड़ सूं
घास रा तिनका री भांत
उगण रो अहसास जतावै।
जिंदगी
फेंक्योड़ी आम री गुठली
उपेक्षा झेलती
पण
माटी, पाणी, हवा
उणरो माण राखै है
समै आया
कुंपळ फूटै
पौधां बणै
रूंख कैवावै
अर
उपेक्षा री सिकार गुठली
आम्बा सूं लड़लूम होय'र
सगळा रो प्यार पावै।
जिंदगी नीम री निंबोळी
कड़वी सुवाद में
पण
औखद बण ज्यावै
नीरोग बणावै
तो नीम री ठंडी छियां रो
मिनख नैं अहसास हुय जावै।
जिंदगी नैं
गुलाब सरीखी चावो
तो
जिम्मेदारियां रा कांटां सूं
मत भागो
प्रीत निभावो।
जिंदगी
पहाड़ सरीखी लागै
सूनै जंगळ मांय
दहाड़ सुण'र डरपावै
पण
धरती री गोद में
ऊपर सूं बैंवती-आंवती
जळधार नदी बण जांवती
निजर आवै तो
गतिसीलता रो अरथ
समझ में आवै है
आप बरसती बूंदां सूं जुड़ी तो सही
रंग बिरंगां इन्द्रधनुस
निजर आसॉ
जिंदगी निरासा रै बादळां नैं हटा'र
आसा री किरणां सूं सराबोर करासी।
