जेठ रा उदास
अर अणजाण्या सा दिन
दरद रा आखर पढ़तां
चोपा देवती ओळू री हबाक
बाळू रेत रा टीबा
ढिगली
अर उधाळै साथै बिखरणौ
सबदां री भूंठी धार
अतीत रै काळजै नै काटै
बूक्यां रो जोर
हथेळी माथै
सौ-सौ थांभ उगावै
पड़छट
सूंत्योड़ी सगती रा पग फूलै
टूटै बिड़द रा झरोखा
दिनां री सूंघ
हिमळास रो गळो मोसै
रात रै ठंडै पौर में
बधती पड़छीयां री जिंदगी रा दरूजा
अेकर आपोआप जुड़ै
दोफारी में
हथेळ्यां जळै
सुरजी रै गरम-गरम टुकड़ा सूं
मांडाणी कनपट्यां रै मांय घोचा देवै
हळफीज्योड़ी जवानी
उण री रगड़क सूं दीसै
सात भांत रा पळम्योड़ा सपनां
सेवट
पगां री लम्बाई घटै
बातां री पुड़तां
सांवटबा सारू मन उफणै
जेठ में टीबा
सिंझ्या भी ठंडा नी हुवै।
