म्हनै ठा है
कांई भी नीं मांड सकूंला
फेरूं कांई गावूंला।
भावां रै आधीन
कियां सुंततर रैवूं
ऊब री बास
चारूंमेर रळमळगी है
गुजर चुक्या है
केई राकेट म्हारै कनै सूं
पिस्टन री जियां
घूमै है चिड़ीघर रौ न्हार
सैंग बस्ती नींद में है
गळी रा गंडकड़ा
आपरा अहं नै
बिन बात उछाळै है
केई मोतां बैठ्या-बैठ्या
म्हैं कर नांखी है
सिरजण रा पांख
फड़फड़ा रैया है
उण सांमली जाळी सूं
लपटां ऊठ रैयी है
सैमूदौ झूंपौ
राखोड़ौ बणग्यौ है
दमकलां टन-टन-टन
कर रैयी है।
सगळी बस्ती
आदी है इण सब सूं
म्हैं नीं जाणूं
कठै जावूंला
पण
म्हनै ठा है
कांई भी कैय नीं पावूंला
फेरूं कांई बतावूंला।
