ओळूं रै किवाड़ां आडी
अटकायोड़ी है
उडीक री आगळ,
जकां नैं ओढाळ्यां पछै
अजै लग नीं खटखटायो किणी
जुगां सूं !
मानवी परस सारू तरसै
किवाड़ां रो काठ
घड़्यां पछै जकां नैं
खाती ई बिसरग्यो!
आखी उमर छोल’र
सूत-सूत जोख’र
सिरज्योड़ी पंचमेळी जोड़ी
गवाड़ रै बिचाळै थरप्योड़ी
पूतळी रै उनमान
थिर ऊभी है
जिणरै ओळै-दोळै
कोनी दीसै कोई जीव-जिनावर
साव मून
फगत बायरै री सूं-सांट
भांगै सूनेड़।
आप फगत देख सको आं किवाड़ां नैं
जिणरै कड़्यां-कूंटां माथै
जम्योड़ी है बगत री खंख!
चीकणास अर मैल सूं
काळूंठो पड़ग्यो आं रो रंग
खडक़ो करियां किसा
खुल सकैला
जंग लाग्योड़ा बोदा कबजा...
चेतो-
आं किवाड़ां रै पाछळ
इतियास रो बास है।
