याद आवै वै प्यारी बातां
गांव खेत री न्यारी बातां
पढ़-लिख’र कठै पूगग्या
मिलै सब जगै खारी बातां
अेक दिन म्हैं जरूर करूंला
जे रैयी अधूरी सारी बातां
म्हैं तो खतम करणी चावूं
फेरूं ई रैवै जारी बातां
दफ्तर रो अैड़ो डर बैठो है
लिखूं करूं सरकारी बातां
ऊजळा चोळा में मिल जासी
मक्कारी, चोरीजारी री बातां
जाणै कठै लारै छूटगी
प्यारी अर किलकारी बातां
जोवूं बाटां उण बगत री
होसी थारी-म्हारी बातां
