ठा नी कद भूलग्यो
म्हारी मंजिल
दौड़ता-दौड़ता
नीं किणी मोड़ रो
ध्यान रैयो तो नी
किणी आसै-पासै रै
ठौड़ ढांयचा रो
बस म्हारै पगां में
ताकत ही, मन में हो भरोसो
म्है वगत रै साथै
दौड़तौ रैयो
धर-मजलां धर कूंचा
पगथल्यां में चबका मारता रैया
अणजाण रास्ता रा
कांटा-कांकरा अर खाडा
पण मंजिल
नेड़ै नी आई
अर नी ओठा पड्यो
कतीक आगी है म्हारी मंजिल
आवता रौ पतझड़ अर बसंत
बस चालण रो इरादो
म्हारै साथै हो
आवता रैया डूंगर-धोरा-जंगल
बाजती रैयी आंधी अर मेह-पाणी
पण कम नीं हुई
म्हारै पगां री ताकत
स्यात मंजिल री उडीक करती हुवैली।
