थे लाखूं हो, पण म्हे अणंत पूरां नैं पाछा घेरां
थे म्हारी परनाळां रोकण जोगा? अरै, बुध विचारो.
कारण, म्हे हूण हां, अेसिया म्हारो रगत है
अर भूकी गरदी म्हारै नैणां रो पसारो।
थारै खातर, धीरा सईका, म्हारी फकत एक घड़ी।
गोलां दाईं, दास अर पड़तळां ज्यूं
म्हे काटां, अेक असरी अर भाखर री सगती,
थारो यूरोप बिलगावां मंगोल दळां सूं।
सईकां सूं थारी घणकूटां भुट्टी पड़गी
तिड़कता बरफ रा झरणा टिक्या है पड़ण खातर
अर अेक अनोखी अणहूंती का’णी ज्यूं
लिस्बन अर फेर मेजिना री पुकार।
सईकां सूं थां पूरब कानी, सगळा सपना संजोया हा,
थां म्हारा मोती चोर्या अर लूंटां लुकाई
मसखर्यां में, थां म्हानैं बंदूकां रा घेरां में राख्या
अर दागण खातर उडीकां लगाई।
बा बखत आयगी है, अर परळै आपरा पंख पसार दिया।
थारो अपमान घणो हुवै अर म्हे रीसां बळां।
बोपो’र रो गजर गूंजसी। म्हे रीस में घंटी बजास्यां
थारो गरबीलो अर नामरद पैइस्तुम हेठै पटकां।
तो थम, जूना संसार, नींतर थारी आखरी आस डूबै
बुधवान, थाक्योड़ा अर सबळा सूत्या हा
बूढा ओडीपस, पाधरो अूभ अर स्फिंक्स रै सामो हुय
बींरी आंख्यां री काळी आडी रो उथळो ला।
रूस री स्फिंक्स, मानेतण, दुखां में हाल
अर रगत चुवै, आपरो भाग मांगै
आथूणी आंख्यां बींरी भाठां री पलकां सूं ढकी
बा तनैं आपरै हेत अर घिरणा में झाल्यो राखै।
हेत री ऊंडाई तैं कद री खाली करी
हेत जिको म्हानैं हरख में हिलावै
तूं तो बीं जबरै हेत नैं कद रो भूल्यो
जिको बाळै अर बाळतो बिलावै।
म्हे बां सारी बातां सूं हेत करां, ठंडा नाच ताव-तपता
अर बै दिरस उस्तादी सूं जोवता।
म्हे सौ क्यूं जाणां: चिलकती फ्रांसीसी चतरायां,
जरमनी री सिंझ्या रा नुंवै संसार रा विचार।
सगळी चेतै है म्हानैं, मोंटमार्टे री, ‘हैल’ गुफा,
वैनिस रो मधरो बायरो ताजगी उड़ावतो,
अंतर री सौरमां, दूर देसां रा संतरां सूं खांची,
कोलोन रो उंचो उठतो भारीभरकम भाठो।
अर म्हे ई सरीर सूं हेत करां, स्वाद, रंग अर सबद सूं,
ईंरी ताजी अर नासवान सुगन जिकी नैड़ी बूठै...
पछै म्हानैं दोस क्यूं जद कदेई थारा हाड
म्हारा भारी नरम पंजां में चरमरा’र टूटै?
म्हे जंगळी बछेर्यां पकड़ां, इसी मोटी म्हारी सगती।
बै बिदकै, बै बिरथा कूदै-फांदै अर धूजै।
बांरा हालता जबाड़ा आखर म्हारा टुकड़ा पावै
अर गोल्यां म्हे पोसां अर मुगत करां।
फेर छोडो थारा जुध रा काळा मारग, मानो
म्हारी सांती री पकड़ झटदेणा,
जूनी तरवार नैं म्यान में घालो अर सुलै राखो
भायप री भावना सूं काढ़ो घिरणा।
जे नईं, तो म्हे जाणां दगै री चालां नैं,
अर म्हांसूं फेर कईं हुवै बातां घणी पोची।
पण, आथूण पासी बां दुड़ता सईकां कानी
थारला टाबर हीणा अर गम्योड़ा, दुरासीसां देसी।
थार चिलकतो योरप अणूता मैदानां में
म्हारलै बनां री भोम में समावै,
म्हारा ऊंडा समदरां सूं म्हे फेर थांनैं जोवांला
बधता, म्हारा अेसिया रा चैरा।
आवो युरालां कानी, बै ऊजळा अऱ विसाल है,
अर भाजो काळी खोवां अर खादरां सारै।
बधतै विग्यान रै बळ दासदळां टकरावो,
मंगोलां नैं मोटी मसीनां धारै।
फेर म्हे ढाल झाल्यां जोवां नईं
थारी बिन-रिच्छा पड़ी भोम कानी।
म्हे जाणां बै खूनी अर भीसण रणखेत,
बेअसर, पसरी निजरां जाणी।
निरदई हूण थारो कूबड़ो माथो ले’र,
छोडैला थारा सैर बाळ जाळ भाजैला।
गिरजां में थारै बांधैला घोड़ा,
बळ योड़ी बासां में धोळिया लोथड़ा लाधैला।
जूना संसार, कमतर कर सांती में, सरब मंगळ हुवै
म्हारो हेलो, सुख रा दिन रातां में।
आखरी बार हरखीलै भायप खातर
बर्बरां री बांसड़ली नूंतै है।
