‘‘सर.!
यहां है प्रस्तावित
महाजन फील्ड फायरिंग रेंज।’’
आ कैवता थकां
बां कै धरी आंगळी
नक्सै री
लिकारां में
अंगूठै जितरी
जाग्यां माथै
म्हारै घरां री
भींतां हालगी
तरेड़ां चालगी।
बां री
बाजती रैयी ताळ्यां
घणै बिसवास साथै
कामयाबी माथै।
म्हारै
सिर री छत
पगां हेठै आंगणों
हुयग्या छांई मांई।
बां सारू
नक्सै में
फगत
अंगूठो टिकै जितरी जाग्यां.!
म्हां सारू
पीढयां रो सीर.!!
बां रै करतां ई
लीक-लिकोळिया
सरकारू कागद माथै..
नक्सै सूं
मिटता गया नांव
म्हारा गांव
बणग्या
हिरोशिमा अर नागासाकी!
