तूटगी म्हारै
गीतां री कड़ियां
जी नै म्हैं
घणै हरख सूं
छींया—तावड़ै रै दासै माथै
पल पल रै धागै सूं
पिरोई ही।
ढब्बू ज्यूं फूल रिया है
हेत रांखणिया पण म्हारी—
पगां हेठै सूं
खिसक जमीं रयी है।
सुण रियौ हूं—
च्यार दिनां री जिनगांणी है
फैर क्यूं अैड़ौ बैवार करै?
फूलां मांय मैक भरी है
मैंदी मांय सिणगार भरियौ है
कारण सगळा जांणै
मौकौ पड़ै जद—
दूजां नीं समझावै
खद नीं अपणावै।
बिचार आवै—
क्यूं धोरां माथै म्हैल चुणावै?
क्यूं बिरथा में थूक उछाळै?
कीकर बातां सूं समझाऊं
मोल समै रौ बतळाऊं।
मैणत कदैयी बिरथा नीं जावै
दिन दूणी—
सरसै मैकै
डांडी बण जावै
भूल्या—भटक्यां री
हिमत बंध जावै
म्हैं तो हिवड़ै रा गीत सुणाऊं
थे जीवण रौ सिणगार करौ।
