कठैई रोहिंग्या
कठैई माओवादी
कठैई नक्सल
देखो जठैई देस में
आंतक री फसल
सिलगै है आज सारो
राज अवधेस रो
ओ कांई ढाळो है देस रो।
कठैई मिंदर कठैई मजीत
धरम री आड़
राड़ ई राड़
लड़ता पंथ
मौलवी संत
फतवां रो दौर
हौर ई हौर
कुण गावै अबै गीत
गांधी रै अपणेस रो
ओ कांई ढाळो है देस रो
कठैई मैतेई-कूकी
लड़ती जातां
चीर हरीजती नारी
गिंडका रै गेह
नग्न देह
होवती वायरल
इंटरनेट माथै
चुकाय रही मोल नारी
कापुरसां रै कळैस रो
ओ कांई ढाळो है देस रो
कठैई दिल्ली रै चौफेर
स्याळू रात
धूजता डैंण
गूंजता खैंखारा
करसां री कूक
किसान रैली
कठैई चीणीजतो
विस्टा प्रोजेक्ट
सांसदां री हेली
कुण देवेला जवाब
किसानां रै तैस रो
ओ कांई ढाळो है देस रो
कठैई चुणाव रैलियां
बंदर बांट
मुफत योजना
कूड़ा कोल
थापता सैंगोल
करता वादा
बणता बाधा
जनता रै खंवां भार
नेतावां री अैस रो
ओ कांई ढाळो है देस रो।
