भानगढ़
अेक ‘हॉन्टेड’ मै’ल
मानीज्यै
जठै नीं रुकै कोई
रात नैं।
कुण जाणै
मै’ल आपरै
सोनल बखत री
ओळूं मांय
नीं चावै
कीं रो सोर, कांगारोळो
स्यात निरवाळो अर सांत
रैवण री
चाह मांय
मै’ल ईज रचिया हुवै
‘हांटेड’ रो ठप्पो।
स्यात इब रात नैं
मै’ल
किणी फिल्म री दांई
चलावतो हुवै
जूना चितराम
‘हुक्म पधार रिया है’
‘खम्माघणी’ सूं लेय’र
सारी रुणक
बठै हाथी घोड़ा
अठै कालीन, दरबारी
राणी-दासी
सै कीं
अर पछै
दिन धोळै
सैंग थमज्यै
अर मै’ल
किणी बडेरै मिनख दांई
मुळकतो रैवै
टुरिस्टां नैं कोतूहल सूं
फोटूआं खींचतां देख’र।
स्यात मै’ल रो ओ
अेकलापो है
जको उडीकै
फोटूआं सूं परै
भींत मांय देखणवाळै नैं।
