कदैई कैवता हा लोग म्हारौ गांव आयौ है।
जिकै नै पीढियां हरमेस आंख्यां में बसायौ है।
जठै रा रूंखड़ा, तालाब, नाळा सैंग म्हारा हा।
जठै रा बादला, धोरा, अवाला सैंग म्हारा हा।
जठै फलसौ सदाई कैवतौ कुण गांव में आयौ।
भलांई आयग्यौ पण बात री बातां किसी लायौ।
हमै तौ भूलग्या वै गांव आली प्रीत री बातां।
जुगां-जुग री अंवेरी मानखै री रीत री बातां।
जठै टिल्लोड़ियां री खीचड़ी नित आवती खीरां।
जठै दी सीख संता अर महतां, औघड़ां पीरां।
उडीकूं आज ई म्हैं गांव आली पीपली सारू।
वठै रा मिंदरां, परसाद री गुल री डली सारू।
कदैई खेजड़ी नै आखरां में याद कर लेऊं।
कदैई बेकलू रै समदरां सूं नैण भर लेऊं।
अजै भुगतूं सदा वा पीड़ म्हारौ गांव खोवण री।
अवस आ चूक व्हैगी आपरी ई गत डुबोवण री।
कदैई स्हैर आली भीड़ सांमी आय कैवै है।
बता क्यूं आंखियां रै मांय थारै आल रैवै है।
अजैई सोध ले थूं आय पाछौ गांव बेलीड़ा।
अजैई जाग जा अर खेल दे औ दांव बेलीड़ा।
