तन-तन नै मुळकाती, दीप सजाती
मंगळ गाती, नव उजास पळकाती
हंसती आवै लिछमी लाडली
आसोज में आस बधाती, आधी काती उजाळी
अमावस री रात अजूणी, चम-चम करै नखराळी
पल-पल पलक बिछाती, सारी रजनी सोभा पाती
जग मग आवै लिछमी लाडली।
नुवां भंडार भरती तम-रज हरती
रमती-झमती, लुळ-लुळ मुजरा करती
धम-धम आवै लिछमी लाडली।
गज-मोतीड़ां रै थाळ सूं, तूठै नंद-किसोर
आंगण-आंगण रै उजास में, मुळकै ई मन मोर
फुलझड़ियां फरमाती पटाखा सूं घणी सरमाती
लपती आवै लिछमी लाडली।
हाळीड़ा हरसाती, राती-माती
रंग रचाती, मीठी मौज मनाती
घर-घर आवै लिछमी लाडली।
आ कामदेव री गोरड़ी, पुळ रा मोती बावै
आलीजै री औकूं मांय, जबरी जोत जळावै
लोभीड़ा नै भाती, नुवैं दीपां सूं तन-तपाती
बगती आवै लिछमी लाडली।
ठुमक-ठुमक मटकाती, मन मुळकाती
लाड-लडाती, लुळ-लुळ लचका खाती
रमती आवै लिछमी लाडली।
मिठाई ढेर-सी लुटाती, बाळकां नै खूब भाती
तारां री बातां सुणाती, खिलती दियां री बाती
बुराई नै बुझाती, दुनिया बिड़दाती ललचाती
मुड़-मुड़ आवै लिछमी-लाडली।
तन-तन नै मुळकाती, दीप जलाती
मंगळ गाती, नव उजास पळकाती
हंसती आवै लिछमी लाडली।
