फिरै डांडतौ
अघोरी काळ
सुण’र दकाळ
भाज छूट्यौ मांनखो
पड्या साव सूना
गांव अर गुवाड़
बीछड़ग्या मांवां सूं नानां टाबर,
टूटग्या संबंध अर सगपण
रिरावै अेक अेक मुट्ठी
दाणां रै खातर वै
जिका बाजता अन्नदाता,
पड़ग्यौ बिखो
खावै खेजड़ां रा छोडा
कळपै आखी जीवा जूण
उडग्या पंखेरू
रह्या अणहेज्या आळां में ईंडा,
जावता रह्या
रूंखां रा मतळबी भायला
हरियल पांनड़ा,
पण कठै जावै
बापड़ा च्यार पगा सांसर?
पटक लिया वां नै बैसग्यां
लूंठी भूख
मंडग्यौ नागड़ी मौत रै घरां
मोटो उच्छब।
