म्हारी फरूकण लागी है
डावी आंख
संभळजौ संभळजौ
सावचेत रेजौ बेलीड़ां!
कै अबकै तौ अणवाया ई
नीपजैला अड़क बीज अर धान
खेतां पछैटा खावती बेलड़ियां
को मावैला नीं फाळ!
इतरौ ई नीं...
वायां तौ घणां ई ऊगैला असल
पण घूंटीज्यां ई कुमळाय विळसेला
कूड़ां अर कपटियां रा गाईजैला जस
आखै जगत
छतापण सांचा रौ सत हारैला...
ईमानदारां री व्हैला फजीहत!
चौड़ै-धाड़ै-
बेईमान धापटा करैला
बात अठै ईं नीं थमैला
कूड़ां अर बेईमांनां रै सिर
सजैला सेवरा अर
होळी माथै आंरा
गाईजैला फाग...
घणी ई झाळ-झाल व्है
उठैला होळका
आपरी रीस
अर उणरी
चटकती देह सूं
उछळैला चिणग्यां अणमाप!
उणरै मंगळीज्यां उपरांयत ई
गाईजता रैवैला फाग
नसै में धुत्त व्हियोड़ै
गेरियां री थाप
छतापण चंग री चीपां तौ
झुरती ई रैवेला अणथक...
इण अबखी अर कोजी वेळा
होळका री रीस नै अंगेज्यां
जिकौ ई कीं करणौ है
थांनै ई करणौ है म्हारा बेलीड़ां
थांनै ई खोलणी है
तीजोड़ी आंख
थांनै ई..!
