म्हारै जवान हियै रा सपना
आव आपां सांप सीढ़ी रमां
म्हैं निसरणी रा च्यार पगोथ्यां चढूं
जित्तै थूं पेट रै पांण रिगस, भाग
अर आगलै खांनै में लाध, फण कीधां
पूणतां ई डस अजेज अर पुगाय दे पाछौ
उण गहरै आंबै री छीयां
के जठै म्हारौ मन उणनै कछकड़ौ घाल्यां देख'र
कलांम-डाळी रम्या करतौ
उणरै परस रा कोडाया
तिसळ तिसळ जावता म्हारा हाथ
वां दिनां रा तारा दूजा हा
वां दिनां री सिझ्या दूजी ही
वौ कांमण दूजौ हौ
अठा लग, के वा अर म्हैं दूजा हा
वै दिन दूजा हा
म्हारै जवान हियै रा सपना, आज म्हैं उण नै पाछी देखी
फगत अब हाड-चांम है वा
तावड़ै गळतौ हाड-चांम
अर म्हारै कनै रैयगी है सांप-सीढ़ी रो गत्तौ।
