भल भरणाती भींग रोही रूंखां रुळ मिलण
सूधी ज्यूं गौ-सींग, लूंग चरै लैरां उडै॥1
डबियांळा डोडां, पेटां भींगां पाँखड़ी
गणमणियां गोडां, भोडां रंग भळकै भलो॥2
जोडां अर जोड़ांह, जाँटी भींगां जुळबुळै
खेलै धी खोड़ांह, डोडां नै डबकत फिरै॥3
डाळी उडणी डोल, पालै पर भींगा पळै
बरणाटै सूं बोल, मोल मोकळै म्हैंदरै॥4
गिदरां पंखी गूंथ, भोडां डोडां भींगड़्यां
चींयां मिमझर चूंथ, खाय मरै जद खाभळी॥5
सोणी-मोणी साख, राख सकै राखण खसै
पण बाळकियाँ पाँख, आँख पुतळियाँ ऊघरै॥6
लड़ बाजूबँध लूम, ऊँटां ओपै गौरबँध
छिणमिणियां छिब छूम, डोडां भींगां डबळका॥7
सूधी घणी सरूप, मूरत भींगां मोवणी
धीयां भोळी धूप, डूंड करै डोडा चुगै॥8
धीजो राखै धीव, गुड्डी गुड्डां गूंथणी
पूजै गुड्डी पीव, डोडां डूँफर भींगड़्या॥9
गुड्यां रै गै’णां, सैंटीटै धीवां सजै
पाँती रा पैणां, खेतां भींगां खोजल्यै॥10
ऊँची केलां आय, दाय, गाय दीपै गुणै
काण रुणै रच काय, खाय खेजड़ी खड़भड़ै॥11
भरणाटां कर भींग, सोणी सूंसाणी सिरै
झरणाटां सूं झींग, गरणाटां गुण गूँजवै॥12
हीरां-पन्ना हेम, डळी पाटलै डगळियाँ
जँवरी भींगां जेम, कुँवरी परखै करसणी॥13
ढेढी ढळकै ढाळ, सोनी सुगणी साँतरी
जुग नाँवां जीयाळ, भल मुरधर री भींगड़ी॥14
रूपै-सोनै राच, चुन्नी भींगां चिलकणी
कचकड़ियो के काच, मोती-मूंगै माण तन॥15
गजरा गूंथण गौर, पूंची पळकण पोवणी
कळा, किसत सूं कौर, झींगां भींगां झूंटणा॥16
कांकणियां कर कोड, मदवां चोटी मो:ळिया
भींगां चिरमी भोड, ल्हालर लटकै लूमक्यां॥17
बोरंग बाजूबंद, चोरँग चिरम्यां चेळकै
कड़ तागड़ियां कंद, आटी डोडा ओपणा॥18
गुड्यां गै’णा गोळ, गळ ठूसी, तेवट गुणां
चिरम्यां रो चित चोळ, बणाव डोडां बोरलां॥19
गुण गरणावै गोत, सायब सँवळा साँवरा
जग भगती री जोत, भींगां मीरां भागली॥20
राजथान घर रोप, भींगां भगती भूँवती
लीलावर रै लोप, गिगण गढां ऊँची उडै॥21
छल्ला-बींटी छैल, डोडा पो टोडा डगां
फबै अडूड़ां फैल, छिब भींगड़ल्यां छेवट्यां॥22
तेवट तिम्मणियांह, तीखां लूंमां तागड़ी
मन बोरां मिणियांह, कस रस भींगां काळजै॥23
भींगां लूंगां भेळ, इड्ढूणी ओपै इधक
मनहर मिनखां मेळ, कीट कळा जबरी जँचै॥24
जंतू जीवण जोग, पण कुण प्राणी अमर गुण
ऊमर मरबा ओग, लोगां लाधै लालड़ी॥25
फबता लीला फोग, खूब हरयोड़ां खेतड़ां
जाँटी पाळै जोग, दूब भींगड़्यां दुबकती॥26
खेतड़लां सूं खोज, टाबर टुर ल्यावै टगी
फुदकण भोळी फ़ौज, हाथ भींग भज हरखता॥27
निमक कुलड़ियै नाख, सुरग पुगावण सोचता
किलक पिदावण काख, छोरा भींगां छे:ल्यै॥28
भींग उडो भरणाट, मामो मुरधर आवियो
मूँछ मतीरां माट, काकड़िया कोछांलियां॥29
विलम विजोगण वोळ, हाडां भींगां हरखती
मूंघा सदा न, मोळ, किसत जुड़ै है कामण्यां॥30
मूळां-मूळां बीज, तोपण फोगां तावड़ै
रंग भींगड़या रीज, गौरी गीतड़लां वळै॥31
जामी कुदरत कूख, रूँखराय वासै वसण
मवड़ां भांगै भूख, रंग, जन-रंजण भींग भल॥32
चमचम चमकै गात, उडत लखावै ओपरी
पण पकड़ण री स्यात, भींग मेमड़ी मन चढै॥33
भींग भवानी आव, भाव पाव प्रसाद ले
सोणै कंठ सभाव, म्हे दरसण बिन दूबळा॥34
मूंगै डोडै कंध, टाँग, मूंछ टाळण विपत
भींग लाल पर, बंध, खेलो खेतां खेजड़ां॥35
मँहीं मैणियै माख, उदर ब्लाउज ओपवर
सेमल तूड़ै साख, भींग मिलो तप मोल बिन॥36
पसुवां में म्रिग अेक, पवित कपोत पँखेरुवां
कीटां राखण टेक, भींग निरामिस भारती॥37
