कुं कूं
सधवा रो साथी
ब्याव रो बिंब
नवोढा नार रो
स्सै सूं मोटो सिणगार
रंग-सुख
कुंकूं रा रंग कैक
कुंकूं विधवा रो बैरी
दुखां रो डूंगर
अभागण नैं ओळभो
रंग-दुःख
कुंकूं रंग रा कैक
कंकूं
बण'र तिलक
जलम-परण मौकै
चढियो लीलाड़
भरतोड़ो साख
भावी पीढ्यां री
रंग-हरख
कुंकूं रा रंग कैक
कुंकूं
बण'र तिलक
चढियो लीलाड़
रोवतै मनां
टूटतै काळजै
औसर मौसर
भरतो साख
मिटती पीढ्यां री
रंग-बिछोव
कुंकूं रा रंग कैक
कुंकूं
मिंदरा रो मोद
भगतां रो भाई
पिंडतां रो प्रिय
पकड़ पुजारियां री आंगळी
चढ़ गियो
भगतां रै भाल
रंग-भगती
कुंकूं रा रंग कैक।
