1.
अटार्यां सूं भरी
धरती माथै
मे’लण नै नीं है ठोड
चिड़कली रै दो पंजां सारू
तो बता रे भाई
आ धरती फगत
मिनख री है काईं?
2.
बेघर हो खुद
निज रा घर
बणावण-बसावण रै
आंधै सुवारथ मिस
आंधै मिनख
उजाड्या म्हारा घरआळा
खुद री ई मेटी पीड़
म्हारी तो बधाई नीं
बेघर होवण री पीड़
देय'र झपीड़?
3.
जिण छातां में
हौवता बरंगा-सैथीर
उणां में होंवता कदैई
म्हारा रैन-बसेरा
बां इज छातां में
होम्यो कब्जो
चीकणीं टाईलां रो
म्हे पंछीड़ा फिरां
डबकता अब
थूं तो भाई
खुद री ई सोची
क्यूं नीं आई?
