चबूतरै सारै
बिखर्यो पड़्यो
बांथां में भर्योड़ो हेत
निसासां सूं
जोड्योड़ी बातां री
काया रो संगमरमर सो
निरमळ रूप!
ओ देखतो रह्यो-
मनवारां रा
प्यालां में
घमरोळ सी मचाती
तिरती सूरत रो
निछरावळ सो रूप!
भाठै-भाठै में
कोर्योड़ा
चितरामां सूं बंध्योड़ी
तिंवार सी जिन्दगी रा
बंसती कोड!
सबदहीण
रात रै
बरसतै अँधेरे
अमूझतां सपनां री
गोरी-गोरी हथेळयां में
पाळयोड़ा
हेत रा रूंख!
पसीनां सूं बणायोड़ी
इमारत रा कारीगरां री
अणथकी मदहोसी
खून रै गारै में
उगायोड़ा फूलां री
चितवण सूं
सरसायोड़ी सांसां रा
हरियल खेत!
पण
ढळती छांया रै साथ
दूरी री सीवां रो
भुलावणो रूप
यथार्थ री धरती सूं
उठतो गयो
बीं री यादां रै सिंवाळै माथै
रपटतै मन री
खिलखिलाती कलपना रा
पंखां सूं
उडायोड़ै जीव रा
भरमायोड़ा पग
पाछा मुड़ै
पण चालै कोनी।
ओ सदा
देखतो रह्यो
ईं री छाती में
पड़योड़ा फफोलां री
मवाद नै
इमरत मान'र
पीवण आळां नै
ओ स्याबास देतो रह्यो
पण बां रा
गोडा टूटग्या
जमानै रा
नाप्योड़ा पगां री
लम्बाई नापतां!
ओ सोक्यूं देख्यो
अर देखतो रैवै
पण आपरो
आपो भूल्यो कोनी हाल!
