बीतियोड़ा बगत री नारी
पड़दा-घूंघटा में लिपटी
अ-अनार रौ नी जाणती
रसोड़ा मांय चूल्हौ-चौको
फाचरी-छाणां भूंगळी साथै
जिंदगाणी बितावती
आंख्यां-धुंवाड़ा सूं
आंधळाय जावती
जिंदगाणी छाणां री भांत
कजळावती,
सासू-नणंद रा ताना तौ
सासरिया रा गीत-गाणा
घट्टी, परिंडौ, पिणघट
पाणी रौ बेवडौ
हमेस काम दर काम
बंधुआ मजूर सरीखौ अंजाम
कुण समझी
उणरी कुंठा-दरद
सिसाड़ा रा इसारां नै
अपमान-धुतकारां नै
वा चिड़ी-चुप्प
गरदन नीची-अंधारौ गुप्प।
