सुण टीटूड़ी।
पांख पसार
भर ऊंचै अम्बरां उडार।
जात-धरम री सींव निमाणी
मिनखां-मिनखां, अळगा पाणी
रीतां-भींता तिरछी, काणी,
जीतब आडी काढै कार।
सुण टीटूड़ी।
पांख पसार।
आ कर, बा कर, अळगी नेड़ी
धरती घातै पगलां बेड़ी
मेड़ी-मेड़ी एक कमेड़ी,
स्वारथ सारू घातै बा’र।
सुण टीटूड़ी।
पांख पसार।
मिनखापत रै दांतां लावण
घर-घर माच्या रांधण-खावण
फाट्यै दूध नीं लागै जावण
रावण, रावण, रैवणौ भार।
सुण टीटूड़ी।
पांख पसार
भर ऊँचे अम्बरां उडार।
