म्हनै मती उडीकजै
क्यूं कै
थारा सूं भैंटण सारू
म्हनै
थारै तांई
ऊपरै आवणो पड़ैला
म्हैं तौ
कीं डूबगौ हूं
कीं डूब जावूंला
पांणी री लकीर री गळाई
सूख जावूंला
मन में चावना
अंगेई कोनी
टूटियौड़ी आस नै
साबत बतावण री
कालै ई सुणियौ है
गळी-गळी फूल बेचण वाळा नै
टी.बी.व्हैगी,
म्हनै फेंफड़ां री बीमारी सूं
घणी चिड़ है
जणांई तौ पीवूं
काळजा री बीमारी सारू
बिना बीमारी
जीवण रौ आणंद कोनी
इणीज बीमारी सूं
औ बोपारी
नित खोलै ब्याज री दुकान
नै
इण सूरज नै-ई
रोज ऊगण री बीमारी है
