जलमी बंद मूठी मैं
आपरा अधिकार लियां,
नी खोली उण री मूठी
नी खोस्या अधिकार,
लाडो रा मायड़-बाप।
झोळी भर दी हेज रा
खील-पतासा अर भैंणल रा
हक सूं बाई री बुआ।
काका जी री सायकल पै बैठ,
लाग ज्यावंता पांख,
पूग ज्यांवती असमाण मैं
दादा जी रा कांधा पै चढ।।
बच्या रैवै बाई रा पांख,
उडती रैवै असमाण मैं,
ई तांई,
बिदाई री बेळ्यां माँ बोली,
कंवर सा, हक नी
हाथ सूँपूं हूँ लाडली रो,
हाथ पकड़ चालियो,
ऊँचा-नीचा रस्ता पै,
अधिकार राख्या है हाथ मैं,
आपरा हक़ लेवण तांई।
बांट लेगी थारै सूं,
जद थे हकदार बणोला।
