देख भायला
थंनै दीखै?
औ फेर बधै है- लांठौ होवै है
औ लोही सूं रळथळियोड़ौ हाथ
रिळ-मिळ जकी मांडी अपां चौपड़
क्यूं सोकड़ देवै थूं?
औ लोही रौ हाथ, इण चौपड़ ने
बिखेरै उण सूं पै’ली – पै’ली
आ जा अपां, अेक-आधौ डाव रमल्यां
खुरपी तौ करलां अपां, बागां मांय
पण भायला
इत्तौ दिखावौ कांई कांम रौ
गुलदस्ता मती सजा
हाथां सूं तोड़ आं फूलां नै
सूंघ रै भायला, पी जा आ सुगंध
थारी, इण खुरपी री धार री, सुगंध है आ
देख। औ लोही सूं रळथळियोड़ौ हाथ
आं फूलां नै-आं बागां नै विणासै
उण सूं पै’ली – पै’ली
आ जा अपां
पीलां
पीळां-राता फूलां री सुगंध
आव भायला
अपां, अपा’रै
स्हैर सूं दूरां चालां थोड़ी ताळ
सुणाऊं थंनै पंछीड़ा परभाती गावता
आं अबोला पंछीड़ां-नै-ई
जद आवै
इण लोही सूं रळथळियोड़ै हाथ री बास
उड़ जावै समदां पार
रूंखां रा ठाया छोड दै
आ जा भायला
इण लोही रा हाथ रै
फिरियां पै’ली-पै’ली
स्हैरां सूं दूरां चाल
अेकर सुणलां
पंछीड़ां नै परभाती गावता
आव भायला
उबांणौ होय घर रै बारै आव
पगतळी रै कानां सुणलां
जामण री छाती धड़कती
नै सांसां लेवती
औ लोही रौ हाथ फिरतां ई
फाटै धरती रौ काळजौ
नै छाती सूनी पड़ जावै
औ लोही रौ हाथ
फिरियां पै’ली–पै’ली
उबांणौ होवै तौ,
सुणलां
धरती री छाती धड़कती
थूं तौ साव गैलौ-सांनियौ ई दीखै
कठै लोही रौ हाथ?
म्हनै तौ दीखै कोनी
हँस मत ना भायला
हां, पै’ली–पै’ल
गैला-सांनिया नै ई दीखै
औ लोही रौ हाथ
चेतौ बावड़ै इत्ती ताळ
औ मिनख रा स्सैं चितरांम पूंछ दै
आ जा भायला
औ लोही रौ हाथ फिरियां पैली-पैली
अपां मिनखां रा स्सैं चितरांम भाळलां
