नित मरै अठै जलमे कोनी
रे, बीज बांझड़ो रेवैलो
ओ-पीड़ अणती देवैलो॥
इण भीड़ भरी धरती माथै
माथै स्यूं माथा भिड़योड़ा
ए छोटोड़ा ए मोटोड़ा
सगळा रा सगळा अड़योड़ा
लागे ज्यूं माही मेळै में
नागौरी बैल भिड़क्योड़ा॥
कुण जाणै किन्नै आवै है
जद दैखो आवै-जावै है
दे सींग धरा पर दे मारै
जै पोचोड़ो कन्नै आवै॥
घणा घूमता दीसे पण
तोल्यां स्यूं हळका पड़ जासी
बातां पर बातां मारणियां
बोल्यां स्यूं पतळा पड़ जासी
ए मिनख रूप ने लाजणिया
आपै स्यूं आगे भाजणिया
ए बम-बारूद बणावणिया
ए चंद्रलोक में जावणिया
कद पशु पणै स्यूं लाजैला
कद मिनख रूप में साजैला!
