बदळाव रो
चकरियो
चालतो रैयो है
म्हारै देस मांय
देस
जिको
मोकळी गांवां री
बस्तियां मांय
पसरयोड़ो है,
बस्तियां
जिकी
गुवाड़ अर चौकां में
चौफेर बस्योड़ी लागै
अर
बां चौकां
अर
गुवाड़ां मांय
बिछयोड़ा पाटा
हथायां करता
मिनखां री होड
लिरांवता रैया है
सियाळै री तपती
धूण्यां री कहाण्यां
अर
ऊनाळै में
चौपाळां री बंतळ
अेक-दूजै सूं
मन-मेळू बातां
करती लोग रैयी है,
पण
बदळाव रो पतझड़
झाड़ग्यो सगळी परम्परावां री
हरियल बेलड़यां,
मरजादा रा बिरछ-
उधाड़ा हुवता-सा लागै,
मरयोड़ै बैल री खेंग ताईं
गांव अर गळी-गुवाड़
देखतो रैयो है
उण रा चितराम!
चालतै-फिरतै
फोटुवां रै बक्सै मांय,
निजू कमरां मांय
सूंई सिंझ्या
बस्तियां मांय सरणाटो
बदळाव री बाट जोंवतो
अठीनैं-उठीनैं
झाखा घालतो
निजर आवै।
