आगली सोची न पाछली
चाणचकै ही समदर रै –
सोड़ियै स्यूं उठ'र
अेक अधगैली पांगळी बादळी
पकड़'र रुत री चिटली आंगळी
चढ़गी सूरज रै घर री डागळी
लागी असाढ़ री करड़ी तावड़ी
पड़गी सांवळी, दाजगी चामड़ी
डरती गुड़'र भोम कानी बावड़ी
पकड़ बांवळियो पून दकाली –
फिट माजनूं, अठीनै बळ आगड़ी
पछै पिसताई ही घणी बापड़ी
रो-रो'र भर दिया गैला'र-गळी
जणां बीं री सैण बीजळी –
बोली, ईंयां कर्यां कांई हुसी बावळी
अब तो 'मैं' नै मिटा'र कर ले
थारी काया नै ऊजळी,
आभै जिसी होय'र आभै में ही जा मिली।
