बाबोसा हा तो सो कीं हो!
हांसी, मजाक अर जोर सूं हांसणो...
बाबो सा सूं मन मांय अेक जबरी हिमत ही
बां सूं हो अखूट हेत
बां सूं कांई कोनी हो!
सो कीं हो
बै हा तो...
बाबो सा ई हा
घर रो दूजो नाम
अब बै कोनी तो घर
फगत खाली मकान रैयग्यो!
बाबो सा हा तो सबद हा
अब तो सबद खुद मून होग्या...
बां रै जायां ठा नीं कितरी पोथ्यां
बेजुबान सी होयगी
ठा नीं कितरी बातां
मन मांय ही रैयगी
जिकी मन रै भंवर मांय
उळझगी फगत!
अन्तस मांय मून पसरग्यो
रिंदरोही सो सरणाटो
अेक कूड़ी लोक दिखाई री हांसी
अणकथी उळझी सी
फगत मन मांय रैगी ओळ्यूं अपार।
