कित्ता दिनां सूं आज गाँव आयो हूं
ओ खुद नैं ई ठा नीं
जिंया ई
हाथां में थैलो अर मुंडे पर मुळक लियां
गाँव रै गुवाड़ रै बस स्टैंड उतर्यौ
तो देख्यो—
जिण खेजड़े रै तळै होवती बातां
तासां रै साथै-साथै
लागता ठहाका
पखेरूंवां री भासावां रो कर्या करता
यादां री गुदड़ी सिड़ता थकां
बूढ़ा-ठेेरा आपरी बोली में उल्थौ
अबे दो-तीन गांयां करै ही उगाळी
एक गधो करै हो गधलेड़ा
रोड़ो पूंछ हिलावतो थको
बगत नै धत्तो बतावे हो
सांगरी तोड़ण आळो कोई नीं हो
जिकी पक-पकनै
सईकां रै ज्यूं
खिर रैयी आपो-आप
खेजड़े तळै
प्लास्टिक पैरयां पड़ी गाँव री लास
खेजड़ो रोवे हो माँ-बायरे टाबर रै ज्यूं
बींरै आंस्वां रा टोपा
टप-टप-टप
पड़ रैया लास रै सिर माथे
आपसी संवाद
हिंये रो हेत
मुसाणां में बळनै राख हुग्यो
इण बगत जद स्सै लोग मानै हा
राजा रो हुक्म
तद दिखणाद सूं उड़'र आयी
कटी किन्नी रो परस
बूढ़े खेजड़े नैं दी थावस
आंसू पूंछतो थको खेजड़ो
आभार केय'नैं
किन्नी सूं बोल्यो—
जिंया बाणियां आपरी बही-खाता में
छोडता आया छप्पनुंवो पान्नौ कोरो
बिंया कठै'ई आपांनै
अठहत्तरूंवो पान्नौ
खाली नीं छोडणो पड़ज्यै।
