धरमियो
सोन चिड़कली रो सुगन लेर
ब्हीर हुयो
गांव री सींव खनै
मिनकी मारग काट्यो
अचरज में पड़ग्यो
बापड़ो कीं सोच’र
जूती लेयनै हाथ मांय मूंधी मारी
मन में बोल्यो- अपसुगण नैं मिटा नाख्यो
म्हारो काम बण जावैलो।
अबै धरमियो
खाथो-खाथो चालण लाग्यो
सहर मांय बड़तां’ई कर्फ्यू
फैरूं फ्यूज उड़ग्यो धरमियै रो।
बीनैं मन भरमावण लाग्यो
दिन-गिरै रो चक्कर उळझावण लाग्यो
सोन चिड़कली रो बिंब
काळो-पीळो दिखण लाग्यो।
सुगणां सूं कदै काम बण्यो
हिम्मत करी
अर
आगै चाल्यो
सागी ठौड़ पूग’र
आपरो काम सलटायनै
गुमान रै साथै पाछो
गांव खानी ब्हीर हुयो।
