ऊठै धमीड़ा अंबर चीर नैं
औरण बूझे रै घण बीर नैं
बीरा नैं बीरा धवणी खीरा क्यूं जगाया
खीरां में टुकड़ा बीजळसार रा तपड़ाया
डामै क्यूं म्हारी काया, प्राणां नैं दाझै क्यूं रै
क्यूं तो कूटै रै लोह सरीर नैं
अैरण बूझे रै घण बीर नैं
मिनखां नैं बांधण मिनखां सांकळां घड़ाई
हाथां हथकड़ियां, पग री बेड़ियां बनाई
मिनखां नैं नीचै दाब्या आंकस परवाणै रै
आपां क्यूं सिरजां जुग री पीड़ नैं
अैरण बूझे रै घण बीर नैं
तीखी धारां री खागां, अणियां रा भाला
लोई सूं रंग दी धरती, दोय हाथ वाळा
सह्या नहीं जावै साम्हीं छाती अै भचीड़ रै
क्यूं तो घड़ देवां आपां तीर नैं
अैरण बूझे रै घण बीर नैं
घड़णो हुवै घड़ रै बीरा, कसिया कुदाळी
अन-धन निपजावै कमधज, हाथां हळबाळी
टाबर है हाथां मांही बाजे खुणखुणिया रै
क्यूं नीं पूंछां नैणां रै नीर नैं
अैरण बूझे रै घण बीर नैं
टांकी घड़, जीवण री जे मेड़ियां चिणावै
जीवण रै रथ री गत नैं धुराई बधावै
सूई सींवै जीवण रा फाट्या गूदड़ा रै
क्यूं नीं बदळ जुग तसवीर नैं
अैरण बूझे रै घण बीर नैं!
