फिरै हांडतौ
अघोरी काळ
सुण’र दकाळ
भाज छूट्यौ मानखो
पड़्या साव सूना
गांव अर गुवाड़
बिछड़ग्या मांवां स्यूं
नांनां टाबर,
टूटग्या सम्बध अर सगपण
रिरावै अेक अेक मुट्ठी
दाणां रै खातर बै
जिका बाजता अन्नदाता,
पड़ग्यौ बिखो
खावै खेजड़ां रा छोडा
कळपै आखी जीवा जूण
उड़ग्या पंखेरू
रह्या अणहेज्या आळां में ईंडा,
जाता रह्या
रूंखां रा मतळबी भायला
हरियल पांनड़ा,
पण कठै जावै
बापड़ा च्यार पगा सांसर ?
पटक लिया बां नै बैसग्यां
लूंठी भूख
मंडग्यौ नागड़ी मौत रै घरां
मोटो उच्छब !
