खेतां अळगोजा बाजै खेतां अळगोजा बाजै।
नाचै कुदरत नो नो ताळ खेतां अळगोजा बाजै॥
कड़ नापै है बाजरियो,
डर मोठा पर निजरियों
आग्यो मूंगा रै फाळ,
खेतां अळगोजा बाजे॥नाचै॥
तीतर सुरताल मिलावै,
पंछी मीठ्ठा सुर गावै
कुरजां ले तेजै री ढाळ,
खेतां अळगोजा बाजै॥नाचै॥
जळ परवा पून भलेरी,
सौरम फूटै चोफेरी
गजबण चालै टेडी चाल,
खेतां अळगोजा बाजै॥नाचै॥
चान्दड़लो रस बरसावे,
नैणां में नींद ना आवै
थारो प्रेम बण्यो जंजाळ,
खेतां अळगोजा बाजै॥नाचै॥
धरती लेवै अंगड़ाई,
बादळियो झड़ी लगाई
तिरियां मिरियां भरिया ताळ,
खेतां में मखण लाजै॥नाचै॥
