हांस-हांस'र, मुळक-मुळक'र
चक राख्यो सिर माथै घर!
हिरोइना जिसा गाभा पेर'र
उड़ती फिरूं तितली ज्यूं आभै मांय!
बाळां रा स्टाइल बणावती सहेली न रोक'र
खिंडा लिया झिंतरिया
बणाऊं पोज फोटू खींचण आळा
खड़ी होय'र सीसै सामीं
मैं गळबायां घालूं बीं छोरै रै
जिणनै दैखती रैई ओलै-छानै
आंख्यां काढती मां, बापू रो डर
अर त्योरियां चढ्योड़ो भाई
नीं होवै मेरै मीठै सपना मांय!
सपना तो होवै आभै तणियै धनख सा
कद आवै निगै आभौ साफ होयां पछै!
