जीव नहीं लागे, पण जीवां,
तिरस नहीं, माडाणी पीवां।
बलगी वेल, डांखला खिरग्या,
सुसग्या फूल, पानड़ा झरग्या,
ठूंठ डालियां रे सैनॉण,
गुठल्यां रै मिस दाखां 'टीवां।
रुत री रमतां आप बिगाड़ी,
पग पाछै पण निजर अगाड़ी,
टूटी डांडी रै सैनांण,
मंजलां बीच पग रखा सीवां।
उमर उडी कै, ऐडै छेडे,
मौत तणी मनवारां तेडै,
घुड़ेती भीतां रे सैनांण,
जोवां जलम मरण री सीवां।
कारयां ऊपर दे दी कारी,
पण काया रै गई उघाड़ी,
पूर लोरियां रे नौंण,
सुपनां री अंगरखियां सीवां।
