भोळी-ढाळी जनता नै ठग रैया लोग।
गांव-गांव लाग रैयो राजनीति रोग।
गरीब नै ना रोटी, कपड़ो-मकान।
छुट भैय्या जीम रैया आज राज भोग।
स्वारथ रै रोटां नै वोटां री आंच।
खोटा तो खीर खावै खरा भाग जोग।
जनता तो सोयगी खैंच खूंटी ताण।
जागैला जद कद जोग-संजोग।
जनतंतर खोयग्यो अरथतंतर मांय।
धन-नेता जन-नेता, आवै तमोग।
पंचां सूं पंचायत घणी भरी पड़ी।
फरड़ पंच चला रैया अस्तर अमोघ।
जाड़ा-मोटा बूंकियां री बणगी पिछाण।
मतिमान माण ही जतळावै सोरा।
चमचेड़ां चिपगी संस्थावां मांय।
चमच्चां री चापलूसी, दीखै अण थोग।
गिरगट्टी चैरा, सै बदळ रैया रंग।
रंग-बदरंगा नै किण-विध सै योग।
