पाणी आडी पाळ खेजड़ी
खेतां री रखवाळ खेजड़ी
खग मृग जीव मानखै खातिर
पण पूरी पड़ताळ खेजड़ी
खावण गूंद सांगरी खोखा
देवण रोटी दाळ खेजड़ी
खोदै ठूंठ ठोठ बण ठाकर
पाळ सकै तो पाळ खेजड़ी
हेटै बैठ'र करां हताईं
चोखी आ चौपाळ खेजड़ी
पणिहारियां नै निरखै-परखै
खिलखिल सरवर पाळ खेजड़ी
गाती गीत तीजण्यां झूलै
हींडो ऊँची डाळ खेजड़ी
गांव गांव मे धोकां गोगौ
पूजां खेतरपाळ खेजड़ी
उण दिस त्याव मांडजै अणभय
जिण दिस चालै भ्हाळ खेजड़ी
हित री भा'ळ हेत री बिरखा
नाचै नौ नौ ताळ खेजड़ी
ऊभा पोड खोखळा अधखड़
दीसे लीली जाळ खेजड़ी
राखो सा'र रोहिड़ां सागै
है टणकी टकसाळ खेजड़ी
रोप्या पांव आबरू राखण
झूझ्या रण भोपाळ खेजड़ी
सत पत सांन हमेसा साखी
जौहर री बण झाळ खेजड़ी
खेजड़ली री ख्यात बात लख
खड़ी सदा प्रतपाळ खेजड़ी
जीया जूण पोखबा जोगी
वारूं मोती थाळ खेजड़ी
जाता गोऴ माळवै गोकळ
करे काळ री टाळ खेजड़ी
