सुण म्हारी कंवरी काची कूंपळ
सीख सिखाऊं भोळी थूं
काकड़ आय बिराजै बनड़ौ
मन री गांठां खोली थूं
तोरण आय'र राइबर जोवै
लुक ज्याई चिड़कोली थूं
सुण म्हारी कंवरी काची कूंपळ
सीख सिखाऊं भोळी थूं
गठजोड़ै री गांठ घुळै ज्यूं
घुळ ज्याई हथ-मौळी थूं
हथळेवै रै पीळै हाथां
वर रौ हियौ टंटोळी थूं
सुण म्हारी कंवरी काची कूंपळ
सीख सिखाऊं भोळी थूं
कौल वचन कर फेरा लेई
कुटम-चोपड़ै रोळी थूं
सासरियै नै सदा सराही
नणदां सूं हंस बोली थूं
सुण म्हारी कंवरी काची कूंपळ
सीख सिखाऊं भोळी थूं
न्याव-ताकड़ी कांण न राखी
बात खरी सुण तोली थूं
नैणां लाज लकोई अे रजवण
घूंघट में मत घोळी थूं
सुण म्हारी कंवरी काची कुंपळ
सीख सिखाऊं भोळी थूं
