म्हारो अलबेलो वीरां रो
म्हारो रण बंकै धीरां रो
म्हारो झुंझारां पीरां रो
कंवळी बाळू रेतां मांही खेतां निपजै धान
काचर बोर मतीरा सीट्टा फलियां है पकवान
कैर सांगरी फोफलियां रो
ताळ तळाइयां पोखरियां रो
और झूंपड़ा छान॥ म्हारो अलबेलो.....॥
रावण हत्था, मोर चंग अपंग संग सांरगी
डैरूं, ढोलक, ढोल, मजीरा, ढ़प, दुकाकी, चंगी
है इकतारो जादूगारो
अेक तार में सरगम सारो
अळगोजै री तान॥ म्हारो अलबेलो....॥
पायल, फीणीं, बंगड़ी, बिछिया, बाजूबन्द पछेली
सीसफूल, सुरलिया, भळको, पैंजणी, चूंप सहेली
मंगळ सूत, मूंदड़ी मुठियो
गजरो चोथ गळै गळपटियो
हाथां में हथपान॥म्हारो अलबेलो....॥
